【尖子同盟】麥明詩龐卓欣扮豬招「選」友
【on.cc東網專訊】 今屆12位準港姐月初出發到東京，展開為期七日訓練，接受化妝、跳舞、Catwalk及在名節目監製前唱歌等密集式特訓。由於每日接受逾10小時訓練，一班佳麗無不呻苦，故偶然會偷走外出玩樂兼Shopping，好讓自己輕鬆一下。
由首輪面試鬥到入十二強的「高挑Charlie」1號麥明詩（Louisa） 與「寸嘴Ada」4號龐卓欣，早已被封為兩大熱門， Louisa更因經常於佳麗前騷Quali而傳出被杯葛，而龐卓欣亦因名氣而「生人勿近」。隨着比賽日子漸近，兩人心知情況不妙，故決定由敵人轉化成「港姐最強」盟友，趁日本集訓時「招兵」增強勢力，向來不起眼的「肥版香香」5號林凱恩，與受疑似不雅短片影響形象的「翻版朱晨麗」10號陳靜儀自然成為目標，四人更偷走到遊戲中心喪玩減壓兼影貼紙相！
鍊車連煞掣都唔識
四人花了5,000円（約320 港元）反轉遊戲店，分別玩賽車及打鼓機。龐卓欣先與林凱恩落場鍊車，自言久未玩賽車Game 的龐卓欣連煞掣也不懂，最後當然輸給林凱恩，而Louisa及陳靜儀在兩人背後打氣，嘈到拆天！其後，雙方交換作賽，身為「尖子」的Louisa同樣敗給陳靜儀。
夾公仔分享戰利品
鍊完車後，四人急不及待夾公仔，兩位「港姐最強」同聲表示是弱項：「真係要向林凱恩同陳靜儀學習。」話口未完， 林凱恩即使出「看家本領」夾公仔，夾前度晒位兼左望右望，狀甚專業，最終成功夾到五個公仔，包括近期大熱的「蛋黃哥」，她又把戰利品分給三人以示友情， Louisa說：「玩呢啲我真係好弱！好在唔係選港姐嘅環節，如果要計分我實輸晒啦！」林凱恩聞言當然個心飄飄然，而「港姐最強」更一起影貼紙相， 鏡頭前扮晒老友，攬頭攬頸，更放下港姐高貴形象，使出「港女10式」狂Chok甫士，玩完單眼又嘟嘴，認真放得開！
隨後她們一行四人轉場食消夜， 更放肆品嘗Food Court的拉麵及天婦羅等高熱量食物，將「食消夜會肥」的概念拋諸腦後！龐卓欣早已因食量驚人「聞名」，原來人仔瘦瘦的陳靜儀亦相當擦得，開懷狂吔麵及麵豉湯，她受訪時講明唔怕肥：「日本行程都幾辛苦，所以難得出嚟玩，食吓消夜就當獎勵自己，唔理得咁多，呢日又有得玩又有得食，算係最開心一日。」
玩完一輪後，已連為一體的四人盡興而歸，而Louisa與龐卓欣對成功「收兵」沾沾自喜， 達成她們最大野心！
Search